Шымкент әкімінің орынбасары Руслан Берденовті атқан күдікті жұмыстан шығарылмағаны, оған бір ай уақыт берілгені белгілі болды, деп хабарлайды +7.kz.
Берденовке жасалған қастандыққа байланысты қылмыстық іс бойынша сот тыңдалымы жалғасып жатыр.
Куәгер ретінде Шымкент қалалық құрылыс басқармасының құрылыс нысандарына мониторинг жүргізу бөлімінің басшысы Аманғали Кенжебеков пен қала әкімінің орынбасары Руслан Берденовтың көмекшісі Талап Рахымбердиевтің жауабы тыңдалды.
Куәгер Кенжебековтың айтуынша, оқиғаға дейін құрылыс басқармасының басшы орынбасары Ердәулет Әжібаев одан “Тұрғын үй Шымкент” ЖШС басшысы Ернар Жиембайдың өз еркімен жұмыстан кету туралы арыз жазған-жазбағанын сұрауды өтінген.
“Мен Жиембайға хабарласып, арыз жазу мәселесін сұрадым. Ол “маған бір ай уақыт берілген еді, болды түсіндім” деп жауап берді”, – деді Аманғали Кенжебеков.
Сондай-ақ ол жұмыста кадрлық іс құжаттар жүргізу өзіне жүктелгенін айтты. Ал, жалпы айыпталушы Ернар Жиембайға қатысты тәртіптік шара көру немесе жұмыстан босату жөнінде ешқандай тапсырма түспегенін жеткізді.
Берденовтің көмекшісі Талап Рахымбердиев те куәгер ретінде тыңдалды. Ол Ернар Жиембаймен жиналыстарда бірнеше рет кездескенін айтты. Олардың арасында жанжал немесе ашық келіспеушілік байқамағанын атап өтті.
Куәгердің сөзінше, екінші кездесуден кейін Жиембай бірнеше рет Берденовпен тікелей сөйлесуді сұрап, телефон арқылы байланысқа шыққан.
“Түсте звондаған кезде маған “Русланға берші телефонды” деді. Мен оған субординация сақтауды, дұрыстап сөйлеуді ескерттім. Себебін “өзім сөйлесемін” деп айтты. Соған қарамастан, ол қайта қоңырау шалып, Берденовтің үйіне баруы мүмкін екенін жеткізді”, – деді куәгер.
Іс бойынша сот тергеуі жалғасып жатыр.
