Қазақстан президенті Қасым-Жомарт Тоқаев Бейбітшілік кеңесінің Жарғысына қол қою рәсіміне қатысады, деп хабарлайды +7.kz ақпарат агенттігі.
Ақорда 22 қаңтар күні Мемлекет басшысы Қасым-Жомарт Тоқаев АҚШ Президенті Дональд Трамптың шақыруымен Бейбітшілік кеңесінің Жарғысына қол қою рәсіміне қатысу үшін Давос қаласына жұмыс сапарымен баратынын хабарлады.
Бұған дейін хабарланғандай, Қасым-Жомарт Тоқаев Газа бойынша құрылып жатқан Бейбітшілік кеңесінің құрамына кіруге Дональд Трамптан ресми шақырту алған алғашқы мемлекет басшыларының бірі болды. Сондай-ақ Қазақстанға осы кеңестің құрушы мемлекеттерінің бірі болу ұсынылды. Президент АҚШ көшбасшысына жауап хат жолдап, шақырту үшін алғысын білдіріп, жаңа бірлестікке қатысуға келісімін жеткізді.
Бұған дейін 22 қаңтар күні Давоста Трамп Газа секторындағы жағдайды реттеуге арналған Бейбітшілік кеңесінің жарғысын жариялау рәсімін өткізетіні хабарланған болатын. Вашингтонның тұжырымдамасына сәйкес, Бейбітшілік кеңесі Газадағы бейбіт дамуға қатысты міндеттемелердің орындалуын стратегиялық бақылауға, халықаралық ресурстарды жұмылдыруға және қадағалауға жауапты болады.
Ақ үйдің мәліметінше, құрушы атқарушы кеңеске (founding executive board) дипломатия, девелопмент, инфрақұрылым және экономикалық стратегия салаларында тәжірибесі бар жеті көшбасшы енеді.
Күтілгендей, құрушы атқарушы кеңестің әрбір мүшесі Газаны тұрақтандыру үшін аса маңызды жеке бағыттарға жауап беретін болады.
Сонымен қатар, жаңа үкіметтің қызметін бақылайтын Газа атқарушы кеңесі (Gaza executive board) құрылады. Бұл кеңеске 11 адам, оның ішінде құрушы атқарушы кеңестің төрт мүшесі кіреді.
Фото: Ақорда
