Тоқаевтың туристік орындарды қалпына келтіру туралы тапсырмасынан кейін шенеуніктер жазаланды, деп хабарлайды +7.kz.
Тоқаев үкіметке тез арада елдегі барлық туристік бағыттың жағдайын реттеп, қате жіберген жауаптыларды жазалауды тапсырған. Курорттық аймақтарды инспекциялау жұмысы нәтижесінде шаралар қабылданып, шенеуніктер жауапкершілікке тартылды.
Мемлекет басшысының тапсырмасына сәйкес Премьер-министрдің орынбасары Ермек Көшербаевтың басшылығымен ведомствоаралық жұмыс тобы құрылды.
10-12 шілдеде Алматы, Қарағанды, Жетісу және Абай облыстарына инспекциялық сапар барысында бірқатар заң бұзушылықтар анықталды.
Жұмыс тобының мүшелері туристермен кездесулер өткізді. Қапшағай су қоймасындағы, Алакөл және Балқаш көлдеріндегі инфрақұрылыммен танысты. Азаматтардың туристік инфрақұрылымның жағдайына, сервистің жеткіліксіз деңгейіне және қауіпсіздік шараларының жоғытығына қатысты хабарламалары расталды.
Әсіресе, коммуналдық жағажайлардың жағдайы ерекше назарға алынды. Онда абаттандыру нормаларын бұзу, чек бермей жұмыс істейтін бизнес субъектілерінде кассалық тәртіптің болмауы, сондай-ақ санитариялық талаптар мен қауіпсіздік нормаларын елемеу фактілері тіркелді.
Инспекция қорытындысы бойынша және Президенттің тапсырмасын орындау үшін жауапты лауазымды тұлғаларға қатысты тәртіптік жаза қолданылды:
– туризмді дамытуға жауапты туризм және спорт вице-министріне, Алматы, Қарағанды, Абай және Жетісу облыстары әкімдерінің орынбасарларына қатаң сөгіс жарияланды;
– Қонаев, Балқаш қалаларының, Алакөл, Мақаншы аудандарының әкімдеріне, ауылдық округтердің әкімдеріне сөгіс жарияланды;
– кәсіпкерлікке, туризмге, қоршаған ортаны қорғауға, сәулет пен саудаға жауапты облыстық басқармалардың басшыларына жазалау шаралары қолданылды;
– экология және табиғи ресурстар, денсаулық сақтау, қаржы, су ресурстары және ирригация, сауда және интеграция, көлік министрлігінің аумақтық бөлімшелерінің басшылары жауапкершілікке тартылды.
Тексеру нәтижесі бойынша туристік инфрақұрылымды дамытудың Жол картасы дайындалатын болады.
Еске салсақ, осыған дейін Тоқаев туристік орындарды қалпына келтіріп, кінәлілерді жазалауды тапсырды.
