Мемлекет басшысы Қасым-Жомарт Тоқаев үкіметке қысқа мерзім ішінде елдегі барлық туристік орындардың жағдайын ретке келтіріп, кінәлілерді жазалауды талап етті, деп хабарлайды +7.kz.
Президенттің баспасөз хатшысы Руслан Желдібайдың хабарлауынша, барлық туристік аймақтар толықтай тексеріліп, кемшілікке жол берген лауазымды тұлғалар жауапкершілікке тартылады.
“Мемлекет басшысы халықтан келіп түскен көптеген шағымға байланысты Алакөл маңындағы әйгілі туристік аймақтың демалушыларды қарсы алуға дайындығы төмен екеніне Үкіметтің назарын аударды. Қажетті туристік инфрақұрылымның, сапалы қызмет көрсетудің және қауіпсіздіктің жеткіліксіз екені атап өтілді», – деп жазды Желдібай Telegram парақшасында.
Үкіметке елдегі барлық туристік орындарды қысқа мерзім ішінде ретке келтіру, сондай-ақ кемшілікке жол берген лауазымды тұлғаларды анықтап, жауапқа тарту тапсырылды.
Еске сала кетейік, қаңтар айында өткен Үкіметтің кеңейтілген отырысында Қасым-Жомарт Тоқаев Қазақстанда туризмді дамыту жұмыстарының баяу жүріп жатқанын атап өткен болатын.
«Бұл – шұғыл шешуді талап ететін мәселе. Туризм ел экономикасының жаңа өсу нүктесіне айналуы керек. Бұл салада артта қалып келеміз, істеліп жатқан жұмыстың нәтижесі көңіл көншітпейді», – деген еді президент.
Оның айтуынша, еліміздің әр өңірінде туристер үшін тартымды орындар бар. Сондықтан қажетті инфрақұрылымды салу жұмысын, соның ішінде жеке инвесторларды тарта отырып, дереу бастау қажет.
Фото: gov.kz
