WhatsApp желісінде енді хабарламаларды тікелей аударуға болады, деп хабарлайды +7.kz.
Бұл туралы компанияның ресми парақшасында айтылды.
“Егер сізге басқа тілде хабарлама келсе, оны басып тұрып, “Аудару” батырмасын таңдасаңыз жеткілікті. Содан кейін аударғыңыз келетін тілді таңдайсыз. Тілді жүктеп алсаңыз, ол болашақ аудармаларда автоматты түрде қолданылады”, – делінген хабарламада.
Аталған мүмкіндік жекелеген чаттарда, топтарда және арналардағы жаңартуларда қолжетімді.
Сонымен қатар, аударма кезінде құпиялық сақталатыны айтылды. Хабарламалардың мазмұнына WhatsApp қол жеткізе алмайды.
WhatsApp желісінің жаңа функциясы Android қолданушыларына да қолжетімді. Чатты автоматты түрде аударуды қосып қойса, жаңа келген хабарламалар бірден таңдалған тілде көрінеді.
“23 қыркүйектен бастап біз хабарламаларды аудару функциясын Android және iPhone қолданушыларына кезең-кезеңімен іске қоса бастаймыз. Қазір тек бірнеше тіл бар, бірақ алдағы уақытта олардың саны артады”, – деді компания өкілдері.
Қазіргі уақытта Android жүйесінде алты тіл қолжетімді: ағылшын, испан, хинди, португал, орыс және араб. Ал iPhone қолданушыларына бірден 19-дан астам тіл ұсынылған.
Фото: pixabay.com
