2026 жылдың 1 қаңтарынан бастап Бірыңғай жинақтаушы зейнетақы қорынан зейнетақы жинақтарын алған азаматтар жеке табыс салығынан босатылады, деп хабарлайды +7.kz.
Зейнетақы қорының мәліметіне сәйкес, 2026 жылдан бастап барлық зейнетақы төлемдеріне ЖТС ұсталмайды. Сонымен қатар, біржолғы зейнетақы төлемдерінен де салық алынбайды. Мұндай қазақстандықтар табыс салығынан босатылады.
Жаңа өзгерістерге сәйкес, 2026 жылдың 1 қаңтарынан бастап тұрғын үй сатып алу немесе емделуге төлеу үшін пайдаланылған, бірақ зейнет жасына жеткенге дейін кейінге қалдырылған біржолғы зейнетақы төлемдерінен ЖТС бойынша бұрын есептелген міндеттемелер жойылады. Алайда, бұрын төленген салықтар қайтарылмайды.
Сондай-ақ, 2026 жылдың басынан бастап өз пайдасына ерікті зейнетақы жарналарын төлеген азаматтар үшін бұрын қолданыста болған салықтық шегерімдер алынып тасталады. Қазіргі уақытта бұл шегерімдер Салық кодексінде белгіленген шектерде табысқа қолданылады.
Сонымен қатар, жұмыс беруші (салық агенті) қызметкердің пайдасына аударатын ерікті зейнетақы жарналары жеке табыс ретінде есептелмейді және тиісінше, ЖТС салынбайды. Мұндай шығындар корпоративтік табыс салығын есептеу кезінде шегерім ретінде ескеріледі. Осылайша, салықтық жеңілдіктер әрі қызметкерге, әрі жұмыс берушіге сақталады.
