Жетісу облысы Жаркент қаласында жантүршігерлік оқиға тіркелді. Анасы баласын батареяға байлап, аяусыз соққыға жыққан сәті видеоға түсіп қалған, деп хабарлайды +7.kz ақпарат агенттігі.
Аталған дерек бойынша Панфилов аудандық полиция бөлімі тексеру жүргізіп, қылмыстық іс қозғады. 28 жастағы әйел полиция бөлімшесіне жеткізіліп, уақытша ұстау изоляторына қамалды.
Балалардың қауіпсіздігін қамтамасыз ету мақсатында олар уақытша Отбасын қолдау орталығына орналастырылды. Оқиғаның барлық мән-жайы анықталғанға дейін осындай шешім қабылданған.
Сонымен қатар, қамқоршылық органдарына әйелді ата-ана құқықтарынан айыру мәселесін қарау үшін тиісті материалдар жолданатын болады.
“Тергеу барысы облыстық полиция департаменті басшылығының жеке бақылауында. Тергеу нәтижесі бойынша кінәлілер Қазақстан Республикасының заңнамасына сәйкес жауапкершілікке тартылады”, – деп хабарлады Жетісу облыстық полиция департаментінің өкілдері.
Балалар Жаркенттен қауіпсіз жерге көшірілді. ҚР оқу-ағарту министрлігінде олардың жағдайы тұрақты екенін, қажетті медициналық көмек көрсетілгенін және психологтардың жұмыс істеп жатқанын мәлімдеді.
“Зардап шеккен балаға қажетті медициналық көмек көрсетілді. Жағдай өңірлік бала құқықтары жөніндегі уәкілдің бақылауында”, – деп мәлімдеді балалардың құқықтарын қорғау комитетінде.
Фото: Видеодан скрин
