АҚШ Сенаты Иранға қарсы әскери әрекеттерді тоқтатуды талап ететін резолюцияны қолдамады, деп хабарлайды +7.kz ақпарат агенттігі.
Сенат қараған құжат іс жүзінде Дональд Трамп әкімшілігін Иранға қарсы әскери операцияларды тоқтатуға және Конгресс ресми түрде күш қолдануға рұқсат бермейінше, америкалық әскерді қақтығыс аймағынан шығаруға міндеттейтін еді.
Associated Press агенттігінің хабарлауынша, Демократиялық партия өкілдері бастамашы болған құжатты 47 сенатор қолдаса, 52 сенатор қарсы дауыс берген. Қазіргі уақытта Конгрестің жоғарғы палатасында бақылау Республикалық партияның қолында, бұл дауыс беру нәтижесіне айтарлықтай әсер еткен.
Резолюция авторлары – демократтар – Иранға қарсы әскери науқан заңсыз және негізсіз деп есептейді. Олар қақтығыс аяқталғанға дейін мұндай бастамаларды Сенат қарауына қайта-қайта шығарып, дауыс берулер ұйымдастыруды жалғастыруға ниетті екенін мәлімдеді.
AP мәліметінше, бұл 2026 жылдың басынан бері Сенаттың әскери шешімдер саласындағы өз конституциялық өкілеттіктерін президенттің пайдасына шектеуден бас тартқан төртінші жағдайы. 1973 жылғы Әскери өкілеттіктер туралы заңға сәйкес, Конгресс әскери әрекеттер басталғаннан кейін 60 күн ішінде соғыс жариялауы немесе күш қолдануға ресми рұқсат беруі тиіс. Бұл мерзім сәуір айының соңында аяқталады, алайда заң оны тағы 30 күнге ұзартуға мүмкіндік береді.
