2024 жылғы Олимпиада ойындарының күміс жүлдегері Нұрбек Оралбай Моңғолияның Ұлан-Батыр қаласында өтіп жатқан бокстан Азия чемпионатында алтын медаль алды, деп хабарлайды +7.kz ақпарат агенттігі.
85 келіге дейінгі салмақ дәрежесінің финалында қазақстандық боксшы Нұрбек Оралбай өзбекстандық Жасурбек Юлдошевпен кездесіп, жекпе-жекті басымдықпен бастады.
Бірінші раундты 5:0 есебімен аяқтап, екінші раундта да үстемдігін сақтады. Шешуші раундта да білгенінен жаңылмаған Нұрбек Оралбай төрешілердің шешімімен жеңімпаз деп танылды.
Айта кетейік, бұған дейін Оразбек Асылқұлов (60 келіге дейін) пен Сабыржан Аққалықов (75 келіге дейін) алтын жүлдені иеленсе, Төрехан Сабырхан (70 келіге дейін) финалда жеңіліп, күміс медальмен шектелді.
Фото: ҚР Бокс федерациясы
