Астанадағы “Көктем-3” тұрғын үй кешенінде үш бала қаза тапқан өртке қатысты күдікті әзірге жоқ, деп хабарлайды +7.kz ақпарат агенттігі.
Бұл туралы ішкі істер министрінің орынбасары Санжар Әділов қазір тергеу жүргізіліп жатқанын мәлімдеді.
“Төтенше жағдайлар министрлігі 292-бап — өрт қауіпсіздігі ережелерін бұзу бойынша тергеуді жүргізіп жатыр. Ішкі істер министрлігі де кәмелетке толмаған балалардың қаза болуына байланысты өз тарапынан тергеуді бастады. Қазіргі уақытта ТЖМ-мен бірлесіп бірқатар сараптама тағайындалды. Енді нәтижесін күту керек. Кінәлі тұлғаларды жауапқа тарту мәселесі міндетті түрде көтеріледі”, — деді ол.
Санжар Әділов қаза тапқан балалардың әкесінің оқиғаға қатысы бар ма деген сұраққа жауап берді және оның күдіктілер қатарында еместігін айтты.
“Бұл істе ешкім күдікті деп танылған жоқ және тергеу жүріп жатыр”, — деді Санжар Әділов.
Еске сала кетейік, сәуір айында Астанада 21 қабатты тұрғын үйдің 15-қабатындағы пәтерден өрт шығып, үш бала қаза тапты. ТЖМ қызметкерлері жоғары қабаттардан 20 адамды эвакуациялады, шамамен 40 тұрғын өз еркімен ғимараттан шықты.
Фото: Видеодан скрин
