Грузияда 18 жастағы Қазақстан азаматы ірі және аса ірі көлемде есірткі заттарын заңсыз сатып алу, сақтау және өткізуге көмектесу күдігімен ұсталды, деп хабарлайды +7.kz ақпарат агенттігі Грузияның Ішкі істер министрлігіне сілтеме жасап.
Ведомство мәліметінше, ел аумағында әртүрлі уақытта 2008 жылы туған екі шетелдік – Қазақстан және Украина азаматтары ұсталған.
Тергеу деректеріне сәйкес, күдіктілердің жеке тінтуі, сондай-ақ олардың уақытша тұрған жерін тінту және тергеу эксперименті барысында құқық қорғау органдары көрсетілген орындардан аса ірі көлемдегі “метадон” есірткісін айғақ зат ретінде тәркілеген.
Сонымен қатар полиция қызметкерлері есірткі заттарын буып-түю үшін қолданылған болуы мүмкін материалдарды да тауып, тәркілеген.
Аталған іс бойынша тергеу Грузия Қылмыстық кодексінің 260-бабы бойынша жүргізілуде. Бұл бап 20 жылға дейін бас бостандығынан айыру немесе өмір бойы бас бостандығынан айыру жазасын қарастырады.
Қазақстанның Сыртқы істер министрлігінің мәліметінше, еліміздің азаматы 2026 жылғы 22 сәуірде Грузияның Имерети өңірінде ұсталған.
“Қолда бар деректерге сәйкес, Грузияның құқық қорғау органдары біздің азаматқа Грузия Қылмыстық кодексінің 260-бабының 1-бөлігі бойынша көзделген “Есірткі заттарын заңсыз сатып алу және сақтау” құқық бұзушылығын жасады деген айып тағуда”, – деп хабарлады министрлік.
Фото: Видеодан скрин
