Қазақстанда келесі жылдан бастап ҰБТ-ға балама болатын жаңа форматтағы қабылдау емтиханын енгізу жоспарланып отыр. Бұл туралы ғылым және жоғары білім министрі Саясат Нұрбек мәлімдеді, деп хабарлайды +7.kz ақпарат агенттігі.
“Биыл ешқандай өзгеріс болмайды. Бәрі бұған дейін жарияланған кесте бойынша өтеді. Екі сынақ тестілеу өткізілді. Енді бірінші негізгі Ұлттық бірыңғай тестілеу басталады”, – деді министр.
Оның айтуынша, келесі жылдан бастап балама ретінде ілкі режимде жаңа AIT (Admission Insight Test) тестілеуі қосылады.
Емтиханды әзірлеумен тестілеу саласындағы әлемдегі жетекші компаниялардың бірі — ETS айналысып жатыр. Оның делегациясы қазақстандық жоғары оқу орындарының өкілдерімен алғашқы кездесулер өткізу үшін Астанаға келіп үлгерді.
Сонымен қатар, сынақ тестілеулері келесі жылы да сақталады, деп хабарлады министр.
“Сынақ форматтын алып тастап, тек бір ғана ҰБТ қалуы мүмкін деген мәселе алаңдатушылық тудырған. Сондықтан сынақ форматы сақталады. Мұндай тесттер әлсіз тұстарды анықтауға мүмкіндік беретін диагностикалық құрал ретінде өзін жақсы көрсетті”, — деп түсіндірді ол.
Жаңа тесттің басты артықшылығы — оның халықаралық деңгейде мойындалуы.
“Бұл ETS болғандықтан — сапа стандарты өте жоғары, олардың тесті автоматты түрде мойындалады. Оны Қазақстандағы шетелдік университеттердің филиалдары да, сондай-ақ шетелдің өзіндегі жоғары оқу орындары да қабылдай алады”, — деді Саясат Нұрбек.
Фото: Ғылым және жоғары білім министрлігі
